پنجی 25 ڈسمبر(ایس او نیوز/پی ٹی آئی): گوا کے شمالی علاقے کلنگٹ بیچ کے قریب ایک سیاحتی کشتی سمندر میں الٹ گئی، جس کے نتیجے میں ایک شخص ہلاک ہوگیا، جبکہ 20 افراد کو بحفاظت بچالیا گیا۔ پولیس نے بتایا کہ یہ واقعہ بدھ دوپہر 1:30 بجے پیش آیا۔

ایک سینئر پولیس افسر کے مطابق، "54 سالہ شخص کی موت ہوئی جبکہ دیگر 20 افراد کو بچا کر قریبی اسپتال لے جایا گیا۔" کشتی پر سوار مسافروں میں چھوٹے بچے اور خواتین بھی شامل تھیں۔

ڈریشٹی میرین کے ترجمان نے، جو گوا حکومت کی مقرر کردہ لائف سیونگ ایجنسی ہے، بتایا کہ کشتی ساحل سے تقریباً 60 میٹر دور الٹ گئی، جس کے نتیجے میں تمام مسافر سمندر میں جاگرے۔

13 افراد پر مشتمل ایک خاندان، جو مہاراشٹر کے کھید سے آیا تھا، کشتی کے مسافروں میں شامل تھا۔ واقعہ کے دوران، ڈریشٹی میرین کے اہلکاروں نے فوری طور پر مدد فراہم کی اور مزید امداد کے لئے کال کی۔

ترجمان کے مطابق، "ڈیوٹی پر موجود 18 لائف گارڈز نے فوری کارروائی کرتے ہوئے مسافروں کو بچایا اور محفوظ طور پر ساحل پر لایا۔ زخمی مسافروں کو ابتدائی طبی امداد فراہم کی گئی اور جن کی حالت تشویشناک تھی انہیں ایمبولینس کے ذریعے اسپتال منتقل کیا گیا۔"

انہوں نے مزید کہا کہ "20 مسافروں میں سے دو بچوں کی عمریں 6 اور 7 سال، اور دو خواتین کی عمریں 25 اور 55 سال تھیں، جنہیں اسپتال میں داخل کیا گیا۔"

بتایا گیا ہے کہ کشتی پر سوار دو افراد کو چھوڑ کر تمام لوگ لائف جیکٹ پہنے ہوئے تھے، جس کی وجہ سے بڑے جانی نقصان سے بچانا ممکن ہوسکا۔

یاد رہے کہ گوا ایک مشہور سیاحتی مقام ہے اور کرسمس اور نئے سال کے موقع پر بہت بڑی تعداد میں سیاح یہاں کا رخ کرتے ہیں۔