فتح پور، 10/دسمبر (ایس او نیوز /ایجنسی)یوپی کے فتح پور ضلع میں یوگی حکومت نے تجاوزات کے خلاف بڑی کارروائی کی ہے اور 180 سال پرانی نوری جامع مسجد کا غیر قانونی حصہ منہدم کردیا ہے۔ اس دوران بڑی تعداد میں پولیس فورس تعینات کی گئی تھی۔ محکمہ پی ڈبلیو ڈی نے ایک ماہ قبل مسجد کو منہدم کرنے کا نوٹس دیا تھا۔ یہ مسجد لالولی شہر کے بندہ ساگر روڈ پر واقع تھی۔

یوپی حکومت نے منگل کو کارروائی کرنے سے پہلے موقع پر بھاری پولیس فورس تعینات کر دی۔ اے ایس پی ، اے ڈی ایم ، آر اے ایف، پی اے سی سمیت کئی تھانوں کی فورسز موقع پر موجود ہیں۔ پانچ سی اوز، 10 تھانہ انچارج، 200 کانسٹیبل، ہیڈ کانسٹیبل اور پی اے سی اور آر اے ایف کی ایک کمپنی موقع پر موجود ہے۔ دراصل یہ مسجد سڑک کو چوڑا کرنے کے دائرہ کار میں آ رہی تھی۔

اس معاملے میں اے ڈی ایم فتح پور نے پہلے ہی نوٹس جاری کر دیا تھا۔ پرانی مسجد کو منہدم نہیں کیا گیا۔ صرف وہی حصہ گرایا گیا ہے جس پر تجاوزات کی گئی تھی۔ نیشنل ہائی وے-335 کو چوڑا کیا جا رہا ہے۔ یہ مسجد اس کے دائرہ کار میں آ رہی تھی۔

اس معاملے پر ہائی کورٹ میں 13 دسمبر کو سماعت ہونے والی ہے۔ مسجد کی جانب سے عدالت میں درخواست دائر کی گئی تھی لیکن عدالت نے اس کیس میں اسٹے نہیں دیا۔ اس کے بعد انتظامیہ نے اس مسجد کو زمین بوس کر دیا۔ ڈرون کے ذریعے پورے علاقے کی نگرانی کی جا رہی ہے۔ 24 ستمبر سے انتظامیہ کی جانب سے سڑک چوڑی ہونے کے باعث تجاوزات کے خلاف مہم چلائی جا رہی ہے۔ اس دوران مسجد انتظامیہ سے ایک ماہ کا وقت مانگا گیا۔ وقت گزرنے کے باوجود مسجد انتظامیہ کی جانب سے کوئی کارروائی نہیں کی گئی۔